Eskolan Konposta

Tag Archive for Auzokonposta

KONPOSTAREN FESTA, AGUSTINETAN ETA FANDERIAN

Iturria: Oarsoaldeako Hitza

Konpostaren festa egingo du udalak laugarrenez larunbatean. Oraingoan, Fanderia eta Agustinetako auzokonposta guneetan, hain zuzen ere, herrian dauden halako sei guneetatik bitan. Agustinetan 10:00etatik 11:30era egingo dute festa, gune horretan kokatutako zenbait ontzitan kalitatezko konpost heldua dagoela baliatuta. Horietako bat hustuko dute auzolanean eta bertaratzen diren bizilagunen artean banatuko dute ateratako konposta hori. Konposta erabiltzeko  gomendioen orria ere banatuko du udalak.

Fanderian berriz, 12:00etatik 13:00etara egingo dute festa, eta bertako familiei konpostajearen prozesuan jarraitu beharreko pausuak gogorarazteko saioa egingo dute, baita familia gehiago animatzeko jarduera ere.

Bi festetan Izadi 21 enpresako teknikariak izango dira, eta auzokonpostan parte hartzen duten bizilagunei begira antolatu badute ere, interesa duen edozein herritarrak har dezake parte. Horren harira, Errenteriako Udalak Agustinetako eta Fanderiako bizilagunak konposta gertutik ezagutzera deitu ditu. Auzokonposta programan parte hartzen duten bizilagunek, beraiek sortutako biohondakinak herrian bertan kudeatu, hondakinen sorrera prebenitu, bilketarako udal gastua murriztu, eta ingurumenari mesede egitea lortzen ari dira. Sei auzokonposta gune daude Erreteria-Oreretan: Fanderia, Agustinak, Gaztañon (2), Alaberga, eta Uztargi Haur Eskolakoa.

Helduta dagoen konposta antzematen denean, konpostaren lagunak homologatutako laborategi batera eramaten dituzte konpostaren kalitatea neurtzeko.

Ate irekien eguna Bidebietako auzo konpostagunean

Ekainaren 3an, larunbatean, 11etatik 13etara

Orain dela lau urte ireki ziren Donostian lehenengo auzo konpostaguneak Añorga Txikin, Aieten eta Igeldon, eta geroztik gogoz aritu dira lanean bertako hainbat bizilagun beraien hondakin organikoak konpost bihurtzen.

Lan hori auzokideei erakustearren, larunbat honetan, ekainaren 3an, Bidebietako auzo konpostaguneko txanda izango da (Serapio Mujika 19). Goizeko hamaiketatik ordubatera, auzokideek eta interesa dutenek aukera izango dute konpostaguneko azpiegitura ikusteko, eta bertan sukaldeko hondakin organikoak konpostatzeko jarraitzen den prozedura ezagutzeko. Konpost ondua ikusi, ukitu eta usaindu ahalko da, eta baita poltsatxo bat etxera eraman ere, loreontzietan erabiltzeko. Halaber, auzokonpostan parte hartu nahi duenak izena eman ahal izango du.

Konpostatzea: zaborra murrizteko tresna bat

Donostian sortutako hondakinak murriztea da lehentasunetako bat nahiz 2015ean onarturiko Tokiko Agenda 21eko III. Ekintza Planean nahiz urte berean udalak onartutako 2030 Ingurumen Estrategian ere. 2030 Ingurumen Estrategiak xedatzen du 2030ean hondakinak % 15 murriztuko direla 2010ean sortutakoen aldean, hau da, biztanleko eta eguneko 1,30 kg-tik igarotzea biztanleko eta eguneko 1,20 kg-ra.

Hondakin gutxiago sortzeko estrategia batzuk lantzen ditu udalak, besteak beste, hondakin organikoak prebenitzea. 2016an, Gipuzkoako Foru Aldundiak eginiko azken karakterizazioko datuen arabera, Donostiako kaleetako errefusa edukiontzietara doan zaborraren % 51 dira hondakin organikoak. Hortaz, oso handia da hobetzeko ahala.

Etxe eta auzo konposta da hondakin organikoak murrizteko aukeretako bat,. Hainbat abantaila ditu hirian konpostatzeak: % 50 ura den hondakin bat garraiatu behar ez izatea, ingurumen aldetik hobeto kudeatzea eta hiriko lurzoru bizirako (ortuak, lorategiak) baliabide bat sortzea. Gainera, auzokoen arteko lan eta harremanak sustatzen ditu auzo konpostak.

Auzolanean

Konpostaguneek modu autonomoan funtzionatzen dute. Udalak azpiegitura muntatu, beharrezkoak diren tresnak jarri, eta materia lehorra (egituratzailea) hornitzen die; gainerako lanak bizilagunek hartzen dituzte bere gain. Bizilagun bat edo biren artean arduradunaren lanak egiten dituzte: astean bitan materiala nahastu eta egituratzailez estali, egituratzailea bukatzen denean udalari jakinarazi, taldea koordinatu, etab. Gainerako partaideek lagundu behar dute konposta ondua ateratzen eta galbahetik pasatzen. Egindako konposta beraiek eramaten dute etxera, loreontzietan edo baratzetan erabiltzeko.

Konpostaguneak ikusgai

Konpost guneek, hondakin biologiko batzuk udal bilketa zerbitzutik desbideratzeaz gain, heziketa eta sentsibilizazio eginkizuna ere bete nahi dute, herritarrak hondakinen eta izan litezkeen konponbideen jakinaren gainean jartzeko.

Hortaz, interesa duten guztiei erakutsi nahi die udalak horrelako instalazioetan egiten den lana. Dagoeneko, Martuteneko eta Bidebietako konpost guneak bisitatu dituzte hainbat ikastetxetako ikasleek. Udazkenean denei sartzen uzteko jardunaldi batzuk antolatu zituzten Beraberako eta Añorga Txikiko konpost guneetan, eta, larunbat honetan, aterak denontzat zabalik egongo dira Bidebietako konpost gunean.

Gunea, 2016an inauguratua, partaide gutxi ditu oraindik, hortaz, udalak inguruetako herritarrei ikustera hurbiltzeko gonbita luzatu nahi die, bai eta erabiltzera adoretu ere. 11:00etatik 13:00ak arte egongo da zabalik gunea, oparitxo bana jasoko dute bertaratzen diren guztiek.

Iturria: donostia.eus

Konpostaren Festa martxoaren 18an Lezon

Datorren larunbatean, martxoak 18an, Konpostaren Festa antolatu du Lezoko Udalak Andreoneko konposta gunean

Jada bi urte bete dira Lezon auzo-konpostaren udal-programa abian jarri zenetik. Une honetan Andreone, Aralar, Arretxene-Txulotxo, San Pedro, Lopene eta Altamiran kokaturiko auzo-konposta guneetan ari dira auzoetako hainbat familia euren biohondakinak konpostatzen. Gaur egun 82 familiak parte hartzen dute eta urtean 20.000 kilo biohondakin udalerrian bertan kudeatzea lortzen ari dira.

Auzokonposta-guneetatik ateratzen den konposta berez konpostatzen duten familientzako bada ere (lorategirako edo baratzerako ongarri gisa erabil dezaten) erabilerarik emateko modurik ez badute, Udalari uzteko aukera dute.

Oraindik ere konpost heldua ateratzear dagoela aitzakia hartuta, Udalak Konpostaren Festa antolatu nahi izan du martxoaren 18an. Hitzordua Andreoneko konpostagunean jarri du, 11:00etan eta interesa duen herritar guztiei zuzendurik dago. Bertan, konposta nola atera ikusi eta nola erabili daitekeen erakusteaz gain, gaiarekin lotuta egon daitezkeen zalantzak argitzeko baliagarri izango da. Horretaz gain, ateratzen dugun konposta erabiltzaileen artean banatuko da.

Auzokonposta-guneetan parte hartzeko aukera irekita dago. Hori dela eta, Udalak Konpostaje Festara etorri eta esperientzia bertatik ezagutzera gonbidatzen ditu herritarrak. Hitzordura gerturatzeko aukerarik ez duenak, baina konpostaje-programan izena eman nahi duenak, udalarekin harremanetan jartzeko aukera du, lezokonposta@gmail.com helbidera idatziz edo 605757687 telefonora zenbakira deituz.

Azken finean, Lezoko biztanleen laguntzarekin ari dira sortutako biohondakinak Lezon bertan kudeatzen, hondakinen sorrera prebenituz, hondakinen bilketarako udal-gastua aurreztuz eta ingurumenari mesede eginez.

Honenbestez, Lezoko Udalak datorren martxoaren 18n, larunbata, Andreoneko gunean ospatuko dugun konpostaren festara hurbiltzeko gonbita luzatzen die herritarrei.
Animatu eta hurbil zaitez!

Iturria: Lezo Ongizate Iraunkorra

Hernanin Auzokonpostarako bost etxola berri jarri ditu Udalak

Bost etxola berri jarri ditu Hernaniko Udalak, herriko bost toki desberdinetan, auzo­konposta egiteko. Zehazki, to­ki hauetan daude etxola berriak: Txantxillan, Elizatxon, Gartzia Goldara­zen, Bidebieta plazan eta Etxeberri auzoan.
Etxola bakoitzean, 22-23 fa­miliak hartuko dute parte, eta dagoeneko hasi dute for­ma­kuntza, aste honetan bertan.

Guztira, 43 etxola Hernanin
Bost etxola berri horiekin, dagoeneko 43 dira Hernanin, auzokonposta egiteko dauden etxolak, herri osoan zehar. Horietan guztie­tan, 1.635 dira konposta egiten duten fami­li­ak: 945 familiak auzo­kon­pos­ta egiten dute, eta beste 690 familiak, berriz, auto­konposta lantzen dute.

Iturria: Urumeako Kronika

 

ERRENTERIA: AUZO-KONPOSTAGUNEEN IKUSKARITZA URTARRILAK 31N

Hurrengo asteartean, urtarrilak 31, Errenterian kokatutako auzo-konposta egiteko guneetara 10. jarraipen-bisita egingo du Udalak.

Ikuskaritza-lanak gauzatzen dituen lantaldeko kideak 14:00etan abiatuko dira Fanderiako gunetik eta, aurreko aldietan egindako moduan, honakoa izango da ibilbidea: Fanderia, Agustinak, Gaztaño eta Alaberga. Jarraipen-bisita hau erabiltzaileek izan ditzaketen zalantzak eta kezkak argitzeko ere baliatu nahi du lantaldeak. Erabiltzaileren batek ikuskaritzako teknikariarekin hitzordua finkatu nahiko balu, 628 532 303 telefonora deitu edo whatsApp bat bidali dezake, edo bestela, ondorengo epostara idatzi, hurrengo astelehena baino lehen: auzokonpostae@errenteria.eus.

Oraindik auzo-konposta egiten ez duten eta parte hartzeko interesa duten familia berriek, era berean, goian aipatutako bideak erabil ditzakete harremanetan jartzeko.

Gaiari buruzko informazio gehiago eskuratzeko, Udalak herritarrak Errenteriako ingurumen atarian sartzera gonbidatzen ditu: http://ingurumena.errenteria.eus

Etxeko konpostajean ere laguntza

Izadi 21eko teknikariek etxeko konposta egiten duten herritarrei ere aholkularitza eta laguntza zuzena eskaintzen die, konposta egiteko orduan sor daitezkeen zalantzei erantzunez, intzidentzien inguruko informazioa jasoaz, eta parte hartzen duten familien eta udalaren arteko zubi-lana eginez. Erabiltzaileek zalantzak izanez gero, honako posta elektronikora idatz dezakete: etxekonpostae@errenteria.eus.

Iturria: HERRI BIZIA

Auzokonposta Donostian: Ate irekien eguna

Urte batzuk pasa dira Donostiako udalerrian auzokonposta egiten hasi zenetik. Hasiera batean Igeldo, Bera Bera eta AñorgaTxikin jarritako auzokonposta guneak inguruko bizilagun eta familiak erabiltzen hasi ziren. Honen arrakasta ikusita, auzokonposta guneak hedatzen joan dira eta gaur egun hamar auzokonposta gune daude udalerrian. Horien artean: Bera Bera, Añorga Txiki, Igeldo, Zubieta, Morlans, Errotaburu, Martutene, Ulia, Bidebieta eta Intxaurrondo.

Lan hori auzokideei erakustearren, datorren larunbatean, azaroaren 19an, Beraberako (Aieten, Kirolaren plazaren ondoan) auzo konpostaguneko ate irekien eguna ospatuko da, goizeko hamaiketatik ordubatera. Auzokideek eta interesa dutenek aukera izango dute konpostaguneko azpiegitura ikusteko, eta bertan sukaldeko hondakin organikoak konpostatzeko jarraitzen den prozedura ezagutzeko. Konpost ondua ikusi, ukitu eta usaindu ahalko da, eta baita poltsatxo bat etxera eraman ere, loreontzietan erabiltzeko. Halaber, auzokonpostan parte hartu nahi duenak izena eman ahal izango du.

dibujo2Eguraldi ona egiten badu, datorren larunbatean, azaroaren 26an, Añorga Txikin ate irekien eguna ospatuko da ere. Bi ekitaldi hauetara gerturatzeko astirik ez baduzu baina auzokonpostan parte hartu nahi baduzu, 943483390 telefonora deitu dezakezu edo ingurumena@donostia.eus helbidera email bat idatzi.

dibujo

AUZOKONPOSTAGUNEEN FUNTZIONAMENDUA
Konpostaguneek modu autonomoan funtzionatzen dute. Udalak azpiegitura muntatu, beharrezkoak diren tresnak jarri, eta materia lehorra (egituratzailea) hornitzen die; gainerako lanak bizilagunek hartzen dituzte bere gain. Bizilagun bat edo biren artean arduradunaren lanak egiten dituzte: astean bitan materiala nahastu eta egituratzailez estali, egituratzailea bukatzen denean udalari jakinarazi, taldea koordinatu, etab. Gainerako partaideek lagundu behar dute konposta ondua ateratzen eta galbahetik pasatzen. Egindako konposta beraiek eramaten dute etxera, loreontzietan edo baratzetan erabiltzeko.

 

LEZOKO AUZOKONPOSTA: URTEBETE EGIN DUGU

Urtebete pasa da Lezoko udalerriak auzokonposta martxan jarri zuenetik. Hori dela eta, aurreko abenduaren 10ean urtebeteko balorazioa egin zuten. Udaleko Ingurumen teknikaria eta Elkarrekin 21 Ingurumen Aholkularitza enpresako teknikariak  familiek auzokonpostari egin dioten harrera positibotzat jo dute.

Momentuz 6 auzokonposta-gune daude kokatuta: Alde Zaharra, Aralar, Arretxene-Txulotxo, San Pedro, Lopene eta Altamira. Guztira 95 familiek parte-hartzen dute, eta familia kopurua kontuan izanik eta, bataz beste, familia bakoitza hiru senidez osatua dagoela onartuz eta pertsonako 0,21kg. biohondakin eguneko sortzen direla estimatuz, urte honetan ia 22.000 kilogramo konpostatu dira. Honekin batera hondakin hauen kudeaketan sortutako Berotegi Efektuko Gasen isurpenak murriztea lortu da.

Udalerri honetako auzokonposta sistemaren berezitasuna, famili bakoitzak bere konpostagailua duela da, etxekonposta sistema erabiliz baina eremu berean.

Udalak herritarrak auzokonposta egitera animatu ditu, nahiz eta gune gehienak %100ean erabili, San Pedro eta Altamirako guneetan oraindik tokirik badago.

20151210_202310

Iturria: Izadi21 / lezo.org

 

Nabigatzen segituz gure cookien politika onartzen duzula ulertuko dugu. Al continuar con la navegación entendemos que aceptas nuestra política de cookies. +Info

Cookien erabilpena. eskolankonposta.eus-k bere cookiak eta hirugarren batzuenak erabiltzen ditu nabigazio esperientzia hobetzeko eta azterketa analitikoak egiteko. Nabigatzen segituz gure cookien politika onartzen duzula ulertuko dugu. Uso de cookies. eskolankonposta.eus utiliza cookies propias y de terceros para mejorar la experiencia de navegación y realizar analíticas. Al continuar con la navegación entendemos que aceptas nuestra política de cookies.

Itxi / Cerrar