San Marko Mankomunitatea osatzen duten udalerrietan eskola baratzak dituzten hainbat ikastetxe daude, bertan beren barazki eta berdurak landatzen dituztelarik. Nekazaritza-ustiapen txiki hauek helburu didaktikoa izaten dute, ikasleak izaten baitira baratza zaintzearen arduradunak, horrela nekazal mundura, bizi-zikloetara, eta ekologiara hurbilduz, baita elikadura burujabetzara eta elikadura osasuntsura ere. Konpostagailuak ere izaten dira laborantza gune horietako batzuetan, baratzeko soberakinak tratatu eta konposta lortzeko balio dutenak.

Hala ere, eskola baratza guztiek ez dute konpostagailurik, dutenen artean asko beren aukeren azpitik erabiltzen dira, eta oso gutxitan erabiltzen da eskola komunitatearen sentsibilizaziorako elementu didaktiko gisa. Era berean, eskola hauetako jangeletan hondakin organiko ugari sortzen da, eta ez da beti konpost guneetara eraman ahal izateko modu egokian jasotzen.

Horrengatik guztiagatik, hezkuntza arloan konposta sustatzeko plana eratu nahi da, gaia modu integralean jorratuz, eta ingurumen heziketa oinarritzat hartuta.