2022. urtearen amaierarekin batera eta behin pandemiak sorturiko zailtasunak gaindituta, geroz eta gehiago dira eskolan bertan sorturiko hondakin organikoaren zati bat berriro ere  bertan kudeatzeko apostua egiten ari diren ikastetxeak. 2023ari gogoz eta indarrez heltzeko asmoarekin, ikastetxe ezberdinetan konpostagailuak jarri dira, tartean Santo Tomas Lizeoa eta Aldapeta Maria Ikastetxea. Bertan ikasle zein irakasleak hamaiketakoan sortzen dituzten hondakin organikoekin eta baratze garbiketan sortutakoarekin konposta egitea dute helburu.

Santo Tomas Lizeoko konpostagailua

Aldapeta Mariako Konpostagailua

Bi eraikinetan baratzea sortzearen aldeko apustua egin da, ia bere osotasunean gune artifiziala den eremuari gune natural bat txertatu eta ikasleekin baratzearen lanketa egin ahal izateko. Baratzea martxan jartzearekin batera, bertan sortzen diren hondakin naturalak zein hamaiketakoetan sortzen direnak ikastetxean bertan kudeatzeko erabakia hartu da, Eskolan Konposta egitasmoarekin bat eginez.

Ikasleen ardura izango den konpostagailuen kudeaketa egokia izan dadin, irakaslegoari zein ikaslegoari zuzendutako tailer zein formakuntza saioak eskaintzeari ekin zaio, hondakin organikoen zikloa ixtearen beharraz eta garrantziaz hausnartu eta bide horretan pausoak ematen joateko.